Комисијата за туризам на ДОМ, по направените анализи, а согледувајќи ја лошата состојба во која се наоѓаат граничните премини во Република Македонија, апелира до надлежните институции на национално и локално ниво да се мобилизираат и да преземаат соодветни активности, со цел Македонија подготвено да го дочека почетокот на туристичката сезона. Република Македонија и нејзините институции имаат една недела за да се подобрат состојбите на граничните премини.

Владата на Република Македонија, во изминатиот период одвои значајни финансиски средства за туристичка промоција на земјава во светот преку учество на туристички саеми, емитување телевизиски спотови, печатени материјали и др. ДОМ, кој од почетокот се залагаше за таква промоција на земјата, овие чекори ги поздравува и смета дека интензитетот на нашата промоција треба уште повеќе да се засили. Но ниедна промоција не може да го избрише првиот впечаток  кој ќе го добијат туристите откако ќе наидат на неуредените и запуштени гранични премини Табановце, Богородица, Деве Баир, Ќафасан и другите.

ДОМ за денот на Планетата Земја, 22 април,  на македонската јавност ја понуди Декларацијата за зелени општини. Оваа Декларација им беше понудена на носителите на власт на локално ниво – градоначалници, претседатели на општински совети, општинските совети, како и на граѓаните на Република Македонија.

На прес конференцијата одржана во Градскиот Парк Скопје, Потпретседателот на ДОМ Соња Лепиткова изрази задоволство и благодарност до потписниците на Декларацијата за зелени општини во Република Македонија.  Декларацијата ја поддржаа  31 градоначалник, 10 претседатели на општински совети, 4 општински совети со одлука ја усвоија, а потпишана а и од голем број советници и граѓани. Декларацијата покрај претставниците од ДОМ, ја потпишаа и носителите на власт од ВМРО ДПМНЕ, Социјалистичка парија на Македонија, ДУИ, Нова демократија, Демократски сојуз и други. Ова ја поткрепува нашата увереност дека свеста за важноста на зелената опција како политика особено во областа на животната средина, социјалните прашања и одржливиот развој, кај политичарите и кај граѓаните  е подигната на многу повисоко ниво. Со денешната прес конференција уште еднаш ја потврдуваме нашата заложба, но и очекувања и подготвеноста за работа на конкретни проекти за остварување на целите на Декларацијата, преку отворена соработка со сите политички и граѓански субјекти.

ДОМ изразува задоволство од одлуката на Министрите за надворешни работи на земјите членки на Европската Унија. Оваа одлука е резултат на долгогодишните напори што Република Македонија ги вложи во процесот на евро-атлантското интегрирање и резултат на посветеноста во исполнувањето на критериумите за наше полноправно членство во Европската Унија.

 Во одлуката на Министрите за надворешни работи на ЕУ, Република Македонија е многу јасно потенцирана, како единствена земја од Западен Балкан која во целост ги исполнила строгите критеруми за визна либерализација поставени од ЕУ и дека со сигурност на почетокот на идната година Македонија ќе биде ослободена од оваа бариера.

 Оваа одлука значи многу за македонските граѓани. Конечно ќе можат да се почувствуваат бенефитите од протокот на луѓе, идеи и капацитети. Тоа значи признавање и на економските, културните, научните и историските вредности кои Република Македонија ги поседува и нивна промоција во Европската Унија.

 ДОМ изразува задоволство и од работата на Владата на Република Македонија, која во изминатиот период, сериозно пристапи кон надминување на овој цивилизациски ѕид и успеа со преземените политики и активности да ја однесе Македонија чекор поблизу до Европската Унија.

Спортско – рекреативниот планински велосипедски маратон Шарски води, кој претставува етапа од Проектот Планинска велосипедска трка низ Македонија Сончев Круг, вчера потврди дека е најголемата спортско рекреативна манифестација во велосипедизмот во Македонија. Вчера на падините на Шар планина, се собраа над 300 велосипедисти во планински велосипедизам од целата држава.

Планинскиот велосипедски маратон Шарски Води 2009, стартуваше во 7.30, од кај Планинарскиот дом Смреки, а целта беше кај детското одмаралиште Бунец, кај Мавровско езеро. Вкупната должина од 92 км., во машка конкуренција прв ја мина Горан Стефановски, а зад него беа Александар Сиљановски и Димитри Димитров, а во женска конкуренција прва беше Челана Димитриевиќ, втора на целта пристигна Елизабета Пољоска, а трета Биљана Митроска.  Маратонот помина во најдобар ред со мали технички проблеми на велосипедистите, кои беа разрешувани на  самата патека и сите пристигнаа на целта.